ئەڵمانیا ڕێز لە بەهمەن قوبادی دەگرێت

 ڕێوڕەسمی ڕێزلێنانی "بەهمەن قوبادی" بە نمایشی بەرهەمە سینەمایی و دیکۆمێنتارییەکانی ئەم سینەماکارە ناودارە کوردە لە سی و چوارەمین خولی فیستیڤاڵی نێودەوڵەتی فیلمی "مۆنیخ" لە وڵاتی ئەڵمانیا بەڕێوەدەچێت.

ڕێوڕەسمی ڕێزلێنانی "بەهمەن قوبادی" بە نمایشی بەرهەمە سینەمایی و دیکۆمێنتارییەکان لە دەرهێنانی ئەم سینەماکارە ناودارە کوردە، لەوانە: فیلمی سینەمایی کاتێک بۆ مەستی ئەسپەکان"، فیلمی سینەمایی "کیسەڵەکانیش دەتوانن بفڕن"، فیلمی سینەمایی "نێوە مانگ"، فیلمی سینەمایی ""کەس ئاگای لە پشیلە ئێرانییەکان نییە!"، فیلمی سینەمایی "وەرزی کەرگەدەن"، فیلمی دیکۆمێنتاریی "دەف"، فیلمی بڵیندی "ئاڵای بێ وڵات" و فیلمی "هەندێک جار چاو لە سەرێ بکە" لە چوارچێوەی کۆمەڵە فیلمی "چەند وتەیەک لەگەڵ خوداکان" لە سی و چوارەمین خولی فیستیڤاڵی نێودەوڵەتی فیلمی "مۆنیخ" Munich لە وڵاتی ئەڵمانیا بەڕێوەدەچێت.

"بەهمەن قوبادی" لە فیستیڤاڵی نێودەوڵەتی فیلمی "مۆنیخ" ئامادە دەبێت و کاتژمێر 6ی دوانیوەڕۆی ڕۆژی 27ی جوونی 2016 لە کۆنگرەی ڕۆژنامەوانی ئەم فیستیڤاڵەدا، وڵامی پرسیاری پەیامنێران، ڕۆژنامەنووسان و ڕەخنەگرانی سینەمایی دەداتەوە. 

فیستیڤاڵی نێودەوڵەتی فیلمی "مۆنیخ" کە دووهەمین ڕووداویی سینەمایی ئەڵمانیا دوای فیستیڤاڵی نێودەوڵەتی فیلمی "بەڕڵین" دێتەئەژما، سی و چوارەمین خولی بە نمایشی کۆمەڵێک فیلم لە دەرهێنانی سینەماکارانی ناوداری وڵاتانی جۆراوجۆر‌ی جیهان لە چەندین بەشی پێشبڕکێی و دەرەوەی پێشبڕکێی لە ڕۆژانی 23ی جوون تا 2ی جوولای 2016 لە شاری مۆنیخ لە وڵاتی ئەڵمانیا بەڕێوەدەچێت